पुणे : ज्येष्ठ नागरिकाच्या बॅगेतील रोख रक्कम, धनादेश, बँकेची कागदपत्रे आणि अन्य महत्त्वाचे साहित्य रिक्षात राहिल्याच्या तक्रारीची योग्य ती दखल न घेतल्याप्रकरणी विश्रांतवाडी पोलिसांवर ठपका ठेवण्यात आला आहे. या प्रकरणात तत्कालीन वरिष्ठ पोलीस निरीक्षक कांचन जाधव आणि महिला पोलीस हवालदार जे. के. कांबळे (बक्कल क्र. ३०७५) यांची चौकशी करून योग्य ती शिक्षा करण्याची शिफारस पुणे विभागीय पोलीस तक्रार प्राधिकरणाने केली आहे.

तक्रारदार शरद नारायण जाधव (वय ७८, रा. येरवडा, पुणे) हे सेवानिवृत्त असून चालण्यासाठी वॉकरचा आधार घेतात. १८ जुलै २०२५ रोजी त्यांनी विश्रांतवाडी येथील बँकेतून पैसे काढले. त्यानंतर मित्रासह रिक्षाने प्रवास करताना मेंटल हॉस्पिटल कॉर्नर, विश्रांतवाडी येथे ते उतरले. उतरताना वॉकरच्या सहाय्याने रिक्षेतून खाली उतरण्यास वेळ लागला. त्याचदरम्यान रिक्षाचालकाने रिक्षा पुढे नेल्याने त्यांची बॅग रिक्षेतच राहिल्याचे तक्रारीत नमूद करण्यात आले आहे.

या बॅगेमध्ये रोख रक्कम, धनादेश, विविध बँकांची पासबुक व चेकबुक, घराच्या चाव्या, चष्मा आणि इतर महत्त्वाची कागदपत्रे असल्याचे तक्रारीत नमूद आहे.

घटनेनंतर जाधव यांनी त्याच दिवशी विश्रांतवाडी पोलीस ठाण्यात तक्रार केली. मात्र, त्यांना दोन दिवस प्रतीक्षा करण्यास सांगण्यात आल्याचे त्यांनी नमूद केले. त्यानंतरही साहित्य आणि पैसे मिळाले नसल्याने त्यांनी रिक्षाचा सीसीटीव्ही फुटेज तपासून संबंधित रिक्षाचालकाचा शोध घेऊन कारवाई करण्याची मागणी केली.

यानंतर माहितीच्या अधिकारातून प्रकरणाची माहिती मागविल्यानंतर त्यांची तक्रार ‘मिसिंग प्रॉपर्टी क्र. ४५१/२०२५’ म्हणून नोंदविण्यात आल्याचे समोर आले.

प्राधिकरणासमोर झालेल्या सुनावणीदरम्यान तक्रारदार ज्येष्ठ नागरिक असून त्यांना चालण्यासाठी वॉकरचा आधार घ्यावा लागतो, ही बाबही नोंदविण्यात आली. प्राधिकरणाच्या आदेशानुसार, तक्रारीची योग्य ती कार्यवाही न झाल्याचे तसेच संबंधित रिक्षाचालक आणि सीसीटीव्ही फुटेजबाबत आवश्यक कार्यवाही न झाल्याचे निरीक्षण नोंदविण्यात आले आहे.

या प्रकरणात तत्कालीन वरिष्ठ पोलीस निरीक्षक कांचन जाधव आणि महिला पोलीस हवालदार जे. के. कांबळे यांना दोषी धरून त्यांची चौकशी करून योग्य ती शिक्षा करण्याची शिफारस प्राधिकरणाने केली आहे. आदेशाची प्रत गृह विभागाचे अपर मुख्य सचिव आणि पुणे शहर पोलीस आयुक्त यांच्याकडे पाठविण्याचे निर्देशही देण्यात आले आहेत.

तक्रारदारांच्या वतीने ॲड. विशाल शिंदे यांनी या प्रकरणाचा पाठपुरावा केला.

पुणे २४ तास

महाराष्ट्राच्या मनातील  मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.

बातम्या व जाहिरातीसाठी संपर्क:

संपादक : – मोहिनी मोहिते

Whatsapp:- 7972087808

Youtube, instagram आणि facebook सह

pune24taas.in

The post ज्येष्ठ नागरिकाच्या तक्रारीची दखल न घेतल्याचा ठपका; विश्रांतवाडी पोलिसांच्या दोन कर्मचाऱ्यांवर कारवाईची शिफारस appeared first on पुणे २४ तास.

पुणे, 12 ऑगस्ट 2026 : खडक पोलीस ठाण्यात दाखल झालेल्या गुन्ह्याप्रकरणी पास्टर पंकज जेम्स देवनूर यांना पुणे येथील अतिरिक्त सत्र न्यायालयाने अंतरिम अटकपूर्व जामीन मंजूर केला आहे. अतिरिक्त सत्र न्यायाधीश अनिरुद्ध सुभाष गांधी यांनी 12 ऑगस्ट 2026 रोजी हा आदेश दिला.

पंकज देवनूर यांच्याविरोधात महाराष्ट्र धर्मस्वातंत्र्य अधिनियम, 2026 मधील कलम 3(1)(A)(III)(V)(VIII), 9(1), 11(1)(2) तसेच Immigration and Foreigners Act, 2025 मधील कलम 23(b) अंतर्गत गुन्हा दाखल करण्यात आला होता.

फिर्यादीनुसार, 8 ऑगस्ट रोजी पवित्रानम देवालय, गुरुवार पेठ, पुणे येथे आयोजित कार्यक्रमात देवनूर यांनी ख्रिश्चन धर्मावर व्याख्यान दिल्याचा आरोप करण्यात आला. मात्र, न्यायालयाने उपलब्ध कागदपत्रे आणि कार्यक्रमाची माहिती पाहता हा कार्यक्रम चर्चच्या 141व्या वर्धापन दिनानिमित्त आयोजित सांस्कृतिक कार्यक्रम असल्याचे प्रथमदर्शनी नमूद केले.

न्यायालयाने असेही निरीक्षण नोंदवले की, कार्यक्रमात इतर धर्मातील व्यक्तींना धर्मांतर करण्याच्या उद्देशाने बोलावण्यात आल्याचे प्रथमदर्शनी दिसून येत नाही. त्यामुळे महाराष्ट्र धर्मस्वातंत्र्य अधिनियमातील संबंधित कलमांची आवश्यक बाब प्रथमदर्शनी पूर्ण झालेली दिसत नसल्याचे न्यायालयाने नमूद केले.

न्यायालयाच्या आदेशानुसार, अटक झाल्यास पंकज देवनूर यांची ₹1 लाखांच्या वैयक्तिक जातमुचलक्यावर आणि समान रकमेच्या जामिनावर सुटका करण्यात येणार आहे. तसेच त्यांनी सोमवार, बुधवार आणि शुक्रवार या दिवशी सकाळी 10 ते दुपारी 1 या वेळेत संबंधित पोलीस ठाण्यात हजेरी लावायची आहे.

याशिवाय, न्यायालयाच्या पूर्वपरवानगीशिवाय भारताबाहेर जाता येणार नाही आणि प्रकरणाशी संबंधित व्यक्तींवर दबाव, धमकी किंवा प्रलोभन आणता येणार नाही, अशा अटीही न्यायालयाने घातल्या आहेत. मुख्य अर्जावर निर्णय होईपर्यंत हा अंतरिम अटकपूर्व जामीन लागू राहणार आहे.

जामिनासाठी रिपाई ख्रिश्चन आघाडीचा पाठपुरावा

या प्रकरणात रिपब्लिकन पार्टी ऑफ इंडिया (रिपाई) ख्रिश्चन आघाडीचे ख्रिस्तोफर राजमनी यांनी सुरुवातीपासून पाठपुरावा केला. गुन्हा दाखल झाल्यापासून ते या प्रकरणावर लक्ष ठेवून असून, संबंधित व्यक्तीला योग्य न्याय मिळावा यासाठी त्यांनी प्रयत्न केले. पंकज जेम्स देवनूर यांना अंतरिम अटकपूर्व जामीन मिळवून देण्यासाठीच्या प्रक्रियेतही राजमनी यांनी पाठपुरावा केला.

न्यायालयाच्या आदेशानुसार  देवनूर यांना अटक झाल्यास ₹1 लाखांच्या वैयक्तिक जातमुचलक्यावर आणि समान रकमेच्या जामिनावर अंतरिम अटकपूर्व जामीन देण्यात आला आहे. या निर्णयाचे स्वागत करताना, प्रकरणात पुढील कायदेशीर प्रक्रिया सुरू असताना न्याय मिळण्यासाठी पाठपुरावा सुरू ठेवणार असल्याचे ख्रिस्तोफर राजमनी यांनी सांगितले.

पुणे २४ तास

महाराष्ट्राच्या मनातील  मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.

बातम्या व जाहिरातीसाठी संपर्क:

संपादक : – मोहिनी मोहिते

Whatsapp:- 7972087808

Youtube, instagram आणि facebook सह

pune24taas.in

The post पास्टर पंकज जेम्स देवनूर यांना अंतरिम अटकपूर्व जामीन appeared first on पुणे २४ तास.

पुणे, प्रतिनिधी : पिंपरी-चिंचवडमधील काळाखडक परिसरात एसआरए (स्लम रिहॅबिलिटेशन अथॉरिटी) प्रकल्पाच्या अनुषंगाने मातंग समाजातील संतोष नेटके यांच्या घरावर प्रस्तावित कारवाई तात्पुरती स्थगित करण्यात आली आहे. पीडित कुटुंबाच्या बाजूने लोकप्रतिनिधी व सामाजिक संघटनांनी पुढाकार घेत संबंधित अधिकाऱ्यांशी संपर्क साधल्यानंतर हा निर्णय घेण्यात आल्याची माहिती देण्यात आली.

मिळालेल्या माहितीनुसार, ३ ऑगस्ट २०२६ रोजी संतोष नेटके यांच्या घरावर बेकायदेशीर कारवाई होणार असल्याची माहिती मिळताच कुटुंबीयांनी तातडीने लोकप्रतिनिधी व समाजातील पदाधिकाऱ्यांशी संपर्क साधला. त्यानंतर आमदार सुनील कांबळे, पुणे शहर जिल्हा मातंग समाजाचे अध्यक्ष अनिल हातागळे, क्रांतिवीर सेनेचे संस्थापक अध्यक्ष मनोज आप्पा क्षीरसागर तसेच भारतीय जनता पार्टी कामगार आघाडी, पुणे शहर अध्यक्ष रवि क्षीरसागर यांनी सारसबाग येथील डॉ. अण्णाभाऊ साठे पुतळा परिसरात बैठक घेऊन संबंधित प्रशासकीय अधिकाऱ्यांशी दूरध्वनीद्वारे चर्चा केली.

या पाठपुराव्यानंतर संबंधित प्रशासनाने प्रस्तावित कारवाई तात्पुरती स्थगित केल्याचे सांगण्यात आले.

यानंतर ४ ऑगस्ट २०२६ रोजी मनोज आप्पा क्षीरसागर व रवि क्षीरसागर यांनी काळाखडक येथे जाऊन संतोष नेटके व त्यांच्या कुटुंबीयांची प्रत्यक्ष भेट घेतली. त्यांनी उपलब्ध कागदपत्रांची पाहणी करून संपूर्ण प्रकरणाची माहिती घेतली तसेच पुढील कायदेशीर प्रक्रियेबाबत चर्चा केली.

यावेळी क्रांतिवीर सेनेचे संस्थापक अध्यक्ष मनोज आप्पा क्षीरसागर यांनी सांगितले की, संतोष नेटके व त्यांच्या कुटुंबाच्या न्याय्य हक्कांच्या संरक्षणासाठी सर्व उपलब्ध कायदेशीर मार्गांचा अवलंब करून सक्षम प्राधिकरणांसमोर ठोस पाठपुरावा करण्यात येईल. मातंग समाजातील कोणत्याही व्यक्ती किंवा संस्थेवर कायद्याबाहेर जाऊन कारवाई होऊ देणार नाही, अशी भूमिका त्यांनी स्पष्ट केली.

संविधान, कायदा आणि न्यायव्यवस्थेच्या चौकटीत राहून पीडितांना न्याय मिळवून देण्यासाठी क्रांतिवीर सेना शेवटपर्यंत संघर्ष करेल, असा निर्धारही यावेळी व्यक्त करण्यात आला.

पुणे २४ तास

महाराष्ट्राच्या मनातील  मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.

बातम्या व जाहिरातीसाठी संपर्क:

संपादक : – मोहिनी मोहिते

Whatsapp:- 7972087808

Youtube, instagram आणि facebook सह

pune24taas.in

The post एसआरए कारवाई तात्पुरती स्थगित; पीडित संतोष नेटके कुटुंबाच्या न्यायासाठी क्रांतिवीर सेनेचा लढा appeared first on पुणे २४ तास.

पुणे- मुंबई उच्च न्यायालयाच्या नागपूर खंडपीठाने जातवैधता प्रमाणपत्रासंदर्भात महत्त्वपूर्ण निर्णय देत स्पष्ट केले आहे की, केवळ धर्मपरिवर्तन किंवा धार्मिक आचरण बदलल्यामुळे व्यक्तीची जन्मजात जात बदलत नाही. हा निर्णय भविष्यातील जातवैधता प्रमाणपत्राशी संबंधित प्रकरणांसाठी मार्गदर्शक ठरण्याची शक्यता आहे.

हे प्रकरण अमरावती येथील २० वर्षीय अभियांत्रिकी विद्यार्थिनी प्राची सुधीर नेटके यांच्या याचिकेशी संबंधित आहे. त्यांनी ‘वाणी’ या इतर मागासवर्गीय (OBC) प्रवर्गातील जातवैधता प्रमाणपत्रासाठी अर्ज केला होता. मात्र, शाळा सोडल्याच्या दाखल्यात जात ‘सैतवाल जैन’ अशी नोंद असल्याचे कारण देत विभागीय जात प्रमाणपत्र पडताळणी समितीने त्यांचा अर्ज फेटाळला होता. तसेच ‘जैन वाणी’ हा समाज राज्याच्या OBC यादीत नसल्याचाही मुद्दा समितीने मांडला होता.

या निर्णयाविरोधात प्राची नेटके यांनी उच्च न्यायालयात धाव घेतली. न्यायमूर्ती उर्मिला जोशी-फाळके आणि न्यायमूर्ती निवेदिता मेहता यांच्या खंडपीठाने प्रकरणाची सुनावणी करत समितीचा आदेश रद्द केला.

न्यायालयाने नमूद केले की, दक्षता पथकाच्या अहवालानुसार प्राची नेटके यांचे कुटुंब पारंपरिकरित्या ‘वाणी’ समाजाशी संबंधित आहे. त्यांनी जैन धर्म स्वीकारला असला तरी त्यामुळे त्यांची मूळ जात बदलत नाही. धर्म आणि जात या स्वतंत्र संकल्पना असून धार्मिक श्रद्धा किंवा आचरण बदलल्याने जन्मजात सामाजिक ओळख बदलत नाही, असे न्यायालयाने स्पष्ट केले.

सर्व पुरावे आणि नोंदींचा विचार करून न्यायालयाने संबंधित जात पडताळणी समितीला प्राची नेटके यांना ‘वाणी’ समाजाचे जातवैधता प्रमाणपत्र चार आठवड्यांच्या आत जारी करण्याचे निर्देश दिले आहेत.

पुणे २४ तास

महाराष्ट्राच्या मनातील  मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.

बातम्या व जाहिरातीसाठी संपर्क:

संपादक : – मोहिनी मोहिते

Whatsapp:- 7972087808

Youtube, instagram आणि facebook सह

pune24taas.in

The post धर्म बदलला तरी जात बदलत नाही; नागपूर खंडपीठाचा महत्त्वपूर्ण निर्णय appeared first on पुणे २४ तास.