भाजप मध्य हवेली तालुका अध्यक्षा कल्पना हांडे यांचा पुढाकार; महिलांकडून समाधान
पुणे : एसटी बसमधील सवलतीच्या प्रवासासाठी स्मार्ट कार्ड अनिवार्य झाल्याने स्वारगेट, शिवाजीनगर आणि पुणे स्थानक येथे ज्येष्ठ नागरिक व महिलांच्या मोठ्या रांगा लागत आहेत. ही गैरसोय लक्षात घेऊन भाजप मध्य हवेली तालुका अध्यक्षा कल्पना हांडे यांच्या पुढाकाराने हांडेवाडी चौक (ता. हवेली) येथे आयोजित स्मार्ट कार्ड नोंदणी शिबिरामुळे शेकडो नागरिकांना मोठा दिलासा मिळाला.
हांडेवाडी, औताडेवाडी, हांडेवाडी रोड आणि परिसरातील ज्येष्ठ नागरिक व महिलांना शहरात जाऊन तासन्तास रांगेत उभे राहण्याची वेळ येत होती. अनेकांना प्रवासाचा खर्च, शारीरिक त्रास आणि वेळेचा अपव्यय सहन करावा लागत होता. ही अडचण ओळखून भाजप मध्य हवेली तालुका अध्यक्षा कल्पना हांडे यांनी स्थानिक पातळीवर स्मार्ट कार्ड नोंदणी शिबिराचे आयोजन केले. या शिबिरात मोठ्या संख्येने महिलांनी व ज्येष्ठ नागरिकांनी सहभाग घेतला. त्यामुळे त्यांची शहरात जाण्याची धावपळ, आर्थिक खर्च आणि रांगेतील प्रतीक्षा टळली.
शिबिराचा लाभ घेतलेल्या अनेक महिलांनी आणि ज्येष्ठ नागरिकांनी समाधान व्यक्त करत, “सरकारी सुविधा आमच्या दारात आल्याने मोठा दिलासा मिळाला,” अशी भावना व्यक्त केली. नागरिकांच्या गरजा ओळखून राबविण्यात आलेल्या या उपक्रमाचे परिसरात स्वागत होत असून, अशा शिबिरांचे आयोजन इतर भागांतही व्हावे, अशी अपेक्षा नागरिकांनी व्यक्त केली.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
