-वर्ष भरात विविध प्रकारचे 4 कोटी 35 लाख अभिलेख केले ऑनलाईन डाऊनलोड
पुणे: (पुणे 24 तास ब्युरो )
राज्यात वर्षभरात ई- महाभूमी प्रकल्पातून नागरिक आणि शेतक-यांनी विविध प्रकारचे सुमारे 4 कोटी 35 लाख ऑनलाईन अभिलेख डाऊनलोड केले, त्याच्या माध्यमातून सुमारे 76 कोटी 80 लक्ष महसूल रूपयांचा महसूल भूमिअभिलेख विभागाकडे जमा झाला आहे. राज्यातील शेतक-यांसह नागरिक देखील तंत्रस्नेही झाली असल्याचे दिसून आले आहे.
राज्यात शेतकरी सरत्या आर्थिक वर्षात म्हणजे 1 एप्रिल 2024 ते 31 मार्च 2025 या एका वर्षात शेतीशी संबंधित तब्बल 4 कोटी 35 लाख अभिलेख (विविध प्रकारच्या नकला) घरबसल्या डाऊनलोड केले. यामुळे महाराष्ट्रातील शेतकरी आता पुर्वीसारखे भोळे-भाबडे राहिले नसून ते आता चक्क हायटेक (तंत्रस्नेही) झाल्याचे स्पष्ट झाले आहे. दरम्यान, शेतकरी तंत्रस्नेही झाल्यामुळे राज्याच्या महसूल विभागात डिजिटल क्रांती झाल्याचे चित्र निर्माण झाले आहे. शिवाय यातून महसूल खात्याला नक्कल शुल्काच्यापोटी तब्बल 76 कोटी 80 लाख रुपयांचा महसूल मिळाला आहे. ही आकडेवारी राज्यातील ई-महाभूमी प्रकल्पाच्या माध्यमातून देण्यात आलेली आहे. या प्रकल्पाच्या माध्यमातूनि डजिटल स्वाक्षरीत सातबारा उतारे, (7/12 उतारा), खाते उतारे, ( गाव नमुना नंबर 8 अ), फेरफार नोंदीचे उतारे आणि मिळकत पत्रिका या नागरिकांना ऑनलाईन पद्धतीने घरबसल्या डाउनलोड करून घेता येतात. त्यानुसार शेतकर्‍यांनी सरत्या आर्थिक वर्षात 3 कोटी 3 लाख 77 हजार 875 सातबारा उतारे, 96 लाख 56 हजार 526 खाते उतारे (8 अ), 20 लाख 31 हजार 522 फेरफार नोंदीचे उतारे आणि 15 लाख 21 हजार 792 मिळकत पत्रिका (प्रॉपर्टी कार्ड) शेतकर्‍यांनी डाऊनलोड केले आहेत. त्या माध्यमातून भूमिअभिलेख विभागाकडे चांगलाच महसूल जमा झालेला आहे.
—————————–
कोट
राज्याच्या महसूल विभागातील ई-फेरफार आणि ई -महाभूमी प्रकल्पाचे यश पाहून, या सेवेतून समाधान होत आहे. कारण ही आकडेवारी पाहता महसूल विभागात झालेली ही डिजिटल क्रांती आहे.
– रामदास जगताप, उपजिल्हाधिकारी, पुणे.
—————————-
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
