पुणे 24 तास:- “पिण्याचे पाणी आजही टँकरवर येते, पावसाळ्यात रस्ते चिखलात जातात आणि घरात कोणी आजारी पडलं, तर उपचारासाठी शहराच्या दुसऱ्या टोकाला जावं लागतं”—उंड्री–महादेववाडीतील ही व्यथा अनेक कुटुंबांचे वास्तव मांडणारी आहे. महापालिकेच्या हद्दीत येऊनही दहा वर्षांपासून मूलभूत सुविधांपासून वंचित असलेल्या या भागातील समस्या मार्गी लावण्यासाठी रस्ते, पाणी, ड्रेनेज आणि आरोग्य सुविधांना प्राधान्य देत प्रशासनाकडून काम करून घेतले जाईल, अशी ग्वाही नवनिर्वाचित नगरसेवक निवृत्ती बांदल यांनी दिली.
उंड्री–महादेववाडी (प्रभाग क्र.४१)चे नवनिर्वाचित नगरसेवक निवृत्ती बांदल यांनी ‘पुणे–२४ तास’शी संवाद साधताना परिसरातील रखडलेल्या विकासाकडे लक्ष वेधले. “सुमारे दहा वर्षांपूर्वी ही गावे महापालिकेत समाविष्ट झाली. मात्र, त्यानंतर निवडणुका लांबणीवर पडल्याने प्रशासनाकडून अपेक्षित कामे झाली नाहीत. परिणामी नागरिक आजही मुलभूत सुविधांसाठी संघर्ष करत आहेत,” असे त्यांनी सांगितले.
या परिसरात बंद नलिकेतून नियमित पिण्याचे पाणी, सांडपाणी व्यवस्थेसाठी ड्रेनेज लाईन, सुरक्षित आणि सुस्थितीत रस्ते, आरोग्यासाठी महापालिकेचे रुग्णालय तसेच वाहतूककोंडी कमी करण्यासाठी रस्ते रुंदीकरण ही तातडीची गरज असल्याचे बांदल यांनी स्पष्ट केले. “या समस्या केवळ आश्वासनांपुरत्या न ठेवता प्रत्यक्षात सोडवण्यासाठी सातत्याने पाठपुरावा केला जाईल,” असा निर्धारही त्यांनी व्यक्त केला.
या संदर्भात राज्याचे उपमुख्यमंत्री अजितदादा पवार, माजी केंद्रीय कृषीमंत्री शरद पवार, खासदार सुप्रिया सुळे, आमदार चेतन तुपे आणि योगेश टिळेकर यांच्याकडे पत्रव्यवहार सुरू करण्यात आला असून, त्यांच्याकडून सकारात्मक प्रतिसाद मिळत असल्याची माहिती बांदल यांनी दिली.
“महापालिकेच्या हद्दीत राहूनही नागरिकांना पाणी, रस्ते आणि आरोग्यासाठी वणवण करावी लागणे, हे प्रशासनाचे अपयश आहे. हा अन्याय दूर करण्यासाठी प्रशासनाला जबाबदार धरून काम करून घेणे, हाच माझा प्राधान्यक्रम असेल,” असे बांदल यांनी स्पष्ट केले.
दहा वर्षांपासून प्रतीक्षेत असलेल्या उंड्री–महादेववाडी परिसराला खऱ्या अर्थाने शहरातील सुविधा कधी मिळणार, हा प्रश्न आता नव्या नगरसेवकाच्या पाठपुराव्यावरच अवलंबून आहे.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
