पुणे (पुणे 24 तास ब्युरो )
राज्यातील जमिनीच्या रेडीरेकनर दरात २०२५-२६ वर्षासाठी सरासरी ३.८९ टक्के वाढ करण्यात आली आहे. पुणे मनपाच्या हद्दीतील रेडीरेकनर दरात ४.१६ टक्के, तर पिंपरी चिंचवड मनपा हद्दीतील रेडीरेकनर दरात ६.६९ टक्के वाढ झाली आहे. रेडीरेकनर दराची अंंमलबजावणी एक एप्रिलपासून करण्यात येईल. राज्याचे नोंदणी महानिरीक्षक रविंद्र बिनवडे यांनी ही माहिती सोमवारी जाहीर केली.
राज्याच्या रेडीरेकनर दरात २०२२-२३ मध्ये सरासरी ४.८१ टक्के वाढ करण्यात आली होती. त्यानंतर, दोन वर्षे रेडीरेकनर दर कायम ठेवण्यात आले होते. यावर्षी दहा टक्के वाढ होईल, अशी चर्चा होती. तर, जगभरातील आर्थिक मंदीच्या पार्श्वभूमीवर रेडीरेकनर दर वाढून नयेत, अशी बांधकाम व्यावसायिक क्षेत्राची मागणी होती.
मुंवई मनपामध्ये ३.३९ टक्के वाढ
बिनवडे म्हणाले, जानेवारी २०२२ ते नोव्हेंबर २०२४ या दरम्यान झालेले दस्त, विकसकांच्या जाहिराती, जमीन आणि सदनिकांची दस्त नोंदणी या सर्व बाबी विचारात घेऊन रेडीरेकनर तयार केले जातात. ग्रामीण क्षेत्रात ३.३६ टक्के, महापालिका हद्दीलगतच्या प्रभाव क्षेत्रात ३.२९ टक्के, नगरपरिषद क्षेत्रात ४.९७ टक्के, मुंबई वगळता महापालिका क्षेत्रात ५.९५ टक्के दरवाढ करण्यात आली. मुंबई महापालिका क्षेत्रात ३.३९ टक्के वाढ करण्यात आली. मुंबई सोडून राज्यातील अन्य भागात सरासरी ४.३९ टक्के दरवाढ केली आहे. मुंबईसह राज्याची सरासरी रेडी रेकनर दरात ३.८९ टक्के वाढ करण्यात आली आहे.
सोलापूर, उल्हासनगर, अमरावतीला मोठी वाढ
राज्यातील २८ मनपाच्या क्षेत्रात सरासरी ५.९५ टक्के वाढ करण्यात आली आहे. सोलापूरला सर्वाधिक १०.१७ टक्के, उल्हासनगरला ९ टक्के, अमरावतीला ८.०३ टक्के, ठाणे मनपा येथे ७.७२ टक्के वाढ करण्यात आली आहे. सर्वांत कमी दरवाढ नांदेड वाघाला मनपामध्ये ३.१८ टक्के वाढ करण्यात आली आहे.
प्रभात -भांडारकर रस्त्यावर सर्वाधिक दर
पुणे महापालिकेच्या हद्दीत प्रभात रस्ता, भांडारकर रस्ता भागात रेडी रेकनरचा सर्वाधिक दर ८६ हजार ७१० रुपये प्रति चौरस मीटर आहे. त्यापाठोपाठ गरवारे हायस्कूल, एसएनडीटी, कर्वे रस्ता या भागात ८१ हजार ५२० रुपये, ज्ञानेश्वर पादुका चौक ते गणेशखिंड रस्ता या भागात ७७ हजार ९५० रुपये, गोखले चौक, बाजीराव रस्ता परिसरात ७७ हजार २२० रुपये चौरस मीटर रेडीरेकनर दर झाला आहे.
इष्टांकाच्या १०५ टक्के महसूल जमा
राज्यात मुद्रांक व नोंदणी शुल्कापोटी कालपर्यंत ५७, ४२२ कोटी रुपये महसूल जमा झाला. या आर्थिक वर्षांत ५५ हजार कोटी रुपये इष्टांक (टार्गेट) गृहीत धरले होते. त्या तुलनेत १०५ टक्के महसूल जमा झाला आहे. आज शेवटच्या दिवशीही राज्यात मोठ्या प्रमाणात दस्त नोंदणी झाली. राज्यात कालपर्यंत २९ लाख १२ हजार ७८३ दस्तांची नोंदणी झाली.
………
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
