पुणे: (पुणे २४ तास ब्युरो)
हडपसर पंचक्रोशीमध्ये १० हजारहून अधिक लिंगायत समाज आहे. हडपसर माळवाडी येथील अमरधाम स्मशानभूमीमध्ये जागा अपुरी पडत आहे. मागिल अनेक वर्षांत पालिका प्रशासनाकडून फक्त माती टाकल्याने उंचवटा झाला आहे. सध्या दफन करण्यासाठी खड्डा घेतल्यावर त्यामध्ये मृत शरीरातील हाडे सापडतात. त्यामुळे पालिका प्रशासनाने लिंगायत समाजाला दफन करण्यासाठी जागा उपलब्ध करून द्यावी, अशी मागणी वीरशैव लिंगायत मंडळाचे अध्यक्ष रवींद्र लाटनेकर यांनी केली आहे.
लाटनेकर म्हणाले की, हडपसर अमरधान स्मशानभूमीमध्ये असलेली जागा कमी पडत आहे. त्यामुळे दफन करताना अनेक अडचणींचा सामना करावा लागत आहे. सध्या उपलब्ध स्मशानभूमीमध्ये गवत उगवले आहे. पावसाळ्यात चिखलमाती, गवतामुळे डासांचा प्रादुर्भाव असतो. दफन करण्यासाठी आलेल्या नागरिकांना बसण्यासाठी जागा अपुरी आहे. येथील जागा समतल नसल्याने नागरिकांची मोठी गैरसोय होत आहे. दफन करण्यासाठी खद्दा खोदला, तर त्यामध्ये हाडं दिसून येतात. नवीन खड्डा कोठे खोदायचा असा प्रश्न पडतो. त्यामुळे पालिका प्रशासनाने जागा उपलब्ध करून द्यावी, असे त्यांनी दै. पुण्यनगरीशी बोलताना सांगितले.
दरम्यान, दफन भूमीच्या जागेत खासगी वखार व्यावसायिकाने पालिकेच्या जागेत अतिक्रमण करून व्यवसाय सुरू केला आहे. त्यावर तातडीने कारवाई करण्याची मागणी गुरुनाथ हडदरे, धंनजय लंगोटे, राजेंद्र कानडे, सुरेश हडदरे यांनी केली आहे.
हडपसर क्षेत्रीय कार्यालयातील महापालिका सहायक आयुक्त बाळासाहेब ढवळे पाटील म्हणाले की, लिंगायत समाजाला हडपसरमधील अमरधान स्मशानभूमीमध्ये जागा कमी पडत असल्याची तक्रार आली आहे. त्यांनी जागा उपलब्ध करून देण्यासाठी पालिकेच्या मालमत्ता विभागाशी बोलून लवकरात लवकर उपाययोजना केली जाईल, असे त्यांनी सांगितले.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
