अनधिकृत होर्डिंगवर २१ दिवसांची नोटीस; घाट मार्गांवर लेन ओलांडण्यास प्रतिबंध आणि साईन बोर्ड लावण्याच्या सूचना
पुणे, दि. १२: – जिल्ह्यातील रस्ते अपघातातील मृत्यूंचे प्रमाण कमी करण्यासाठी अपघातग्रस्त (ब्लॅकस्पॉट) भागांवर तातडीने उपाययोजना राबविणे, वाहतूक नियमांचे उल्लंघन करणाऱ्यांवर कठोर दंडात्मक कारवाई करून परवाने रद्द करणे तसेच अनधिकृत होर्डिंग हटविण्यासाठी २१ दिवसांची नोटीस देऊन कारवाई करणे, यासह घाट मार्गांवर लेन ओलांडण्यास प्रतिबंध घालण्याच्या स्पष्ट सूचना जिल्हाधिकारी जितेंद्र डुडी यांनी दिल्या.
जिल्हाधिकारी कार्यालयात जिल्हा रस्ता सुरक्षा समितीची बैठक आयोजित करण्यात आली. यावेळी सार्वजनिक बांधकाम विभागाचे अधीक्षक अभियंता भरतकुमार बाविस्कर, पुणे शहर वाहतूक शाखेचे उपायुक्त हिंमत जाधव, सहायक उपप्रादेशिक परिवहन अधिकारी स्वपनील भोसले, पिंपरी-चिंचवडचे राहूल जाधव, बारामतीचे सुरेंद्र निकम, भारतीय राष्ट्रीय महामार्ग प्राधिकरणाचे प्रकल्प संचालक संजय कदम, विविध सामाजिक संस्थांचे प्रतिनिधी उपस्थित होते.
बैठकीत जिल्हाधिकारी डुडी यांनी स्पष्ट केले की, पुणे शहर व जिल्ह्यातील वाहतुकीला शिस्त लागण्यासाठी नियमभंग करणाऱ्यांवर कठोर दंडात्मक कारवाई करावी. दंड न भरणाऱ्या वाहनधारकांचे वाहन चालविण्याचे परवाने रद्द करण्याची कार्यवाही करावी. आतापर्यंत सुमारे तीन हजार वाहनधारकांचे परवाने रद्द करण्यात आले असल्याची माहिती त्यांनी दिली. वाहतूक कोंडीमागे नियमांचे उल्लंघन हे एक प्रमुख कारण असून नागरिकांनी स्वयंशिस्त पाळणे आवश्यक असल्याचे आवाहनही त्यांनी केले. जिल्ह्यात वार्षिक ९०० पेक्षा अधिक अपघाती मृत्यू होत असल्याचे निदर्शनास येत असल्याने ब्लॅकस्पॉटचे सखोल सर्वेक्षण करून तातडीने सुधारणा करणे गरजेचे असल्याचे अधोरेखित करण्यात आले.
मागे झालेल्या बैठकीतील सूचनांनुसार प्रादेशिक परिवहन विभागाने ब्लॅकस्पॉटचे सर्वेक्षण पूर्ण केले असून ४२ ब्लॅक स्पॉट होते त्यातील १५ ब्लॅक स्पॉट काढण्याचे काम सुरु आहे. उर्वरित ब्लॅक स्पॉट काढण्याची संबंधित विभागांनी कार्यवाही करावी, असे निर्देश देण्यात आले. हिंजेवाडी व चाकण परिसरातील वाढत्या वाहतुकीच्या पार्श्वभूमीवर विशेष उपाययोजना करण्याचेही निर्देश जिल्हाधिकाऱ्यांनी दिले.
जिल्ह्यातील एमएसआरडीसी, एनएचआय व सार्वजनिक बांधकाम विभागांनी त्यांच्या अखत्यारीतील अनधिकृत होर्डिंगवर तात्काळ कारवाई करावी. संबंधितांना २१ दिवसांची नोटीस देऊन त्यानंतर उर्वरित होर्डिंग काढून टाकावीत, असे आदेश जिल्हाधिकाऱ्यांनी दिले. तसेच घाट मार्गांवर वाहनांनी लेन ओलांडून पुढे जाण्यास प्रतिबंध घालून आवश्यक तेथे साईन बोर्ड व चेतावणी फलक लावावेत. शक्यतोवर मुख्य रस्त्यावर गतिरोधक करु नयेत, धोकादायक जनक्शन असल्यास अप्रोच/दुय्यम रस्त्यावर इंडियन रोड कॉग्रेस प्रमाणे गतिरोधक व चिन्हानकन करावे. पुणे ग्रँड टूर सायकल स्पर्धेच्या धर्तीवर इंडियन रोड कॉग्रेसच्या मार्गदर्शक तत्वाप्रमाणे स्मूथ गतीरोधक असावेत. मुख्य रस्त्याला पांढऱ्या पट्ट्या, दिशादर्शक फलक लावावेत.
नवले ब्रिज परिसरातील अपघात कमी करण्यासाठी समितीमार्फत आयआयटी दिल्लीचे मार्गदर्शन घेण्याचा निर्णय घेण्यात आला होता, त्यानुसार आयआयटीचे पथक, भारतीय राष्ट्रीय महामार्ग प्राधिकरण,पोलीस विभाग, महानगरपालिकांचे अधिकारी मिळून सोमवारी भेट देवून पाहणी करावी. यावेळी पत्रकार, नागरिकांनी आपल्या सूचना कराव्यात, असे आवाहन डुडी यांनी केले आहे.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
