रेडी रेकनर दर ८ ते १५ टक्क्यांपर्यंत वाढण्याची शक्यता

राज्य सरकारच्या महसुली उत्पन्न वाढविण्यासाठी उपाय

पुणे (पुणे24 तास ब्युरो )

राज्य शासनाचे महसुली उत्पन्न वाढविण्यासाठी रेडी रेकनर दरात आठ ते १५ टक्क्यांपर्यंत वाढ करण्याबाबत महसूल विभाग गांभिर्याने विचार करीत आहे. लाडकी बहीण योजना, तसेच अन्य विविध विकास कामाचा वाढता बोजा लक्षात घेता, महायुती सरकारला आर्थिक आघाडीवर उत्पन्न वाढविण्यावर भर द्यावा लागणार आहे. मात्र, रेडीरेकनर दरात वाढ केल्यास, त्याचा थेट परिणाम बांधकाम व्यवसायावर होणार आहे.

राज्य सरकारने गेल्या दोन वर्षांत रेडी रेकनर दरात वाढ केलेली नाही. त्यामुळे आता त्यात वाढ करण्याबाबत हालचाली सुरू आहेत. जीएसटी, विक्री कर यानंतर तिसऱया क्रमांकाचे सर्वाधिक उत्पन्न नोंदणी आणि मुद्रांक शुल्कातून मिळते. २०२२-२३ मध्ये ३२ हजार कोटी रुपयांचे उद्दीष्ट ठेवले असताना, ४४ हजार ६८१ कोटी रुपये उत्पन्न मिळाले होते. दस्त नोंदणीतून गेल्या वर्षी २०२३-२४ मध्ये ५० हजार कोटी रुपयांचे उद्दीष्ट ठेवले होते. गतवर्षी दोन लाख ९० हजार १९१ दस्ताची नोंदणी झाली. त्याद्वारे राज्यसरकारला ५० हजार कोटी रुपये उत्पन्न मिळाले.  राज्य सरकारने या आर्थिक वर्षांत ५५ हजार कोटी रुपयांचे उद्दीष्ट ठेवले आहे. गेल्या एप्रिलपासून आजपर्यंत दोन लाख दहा हजार दस्त नोंदले गेले असून, त्याद्वारे ४१ कोटी रुपये म्हणजे उद्दीष्ट्याच्या तुलनेत ७५ टक्के महसुली उत्पन्न मिळाले आहे.

महायुतीचे सरकार आता उत्पन्न वाढीसाठी प्रयत्न करीत असताना, गेल्या दोन वर्षांत रेडी रेकनर दरात वाढ न केल्याचे लक्षात घेत, आगामी आर्थिक वर्षांत तो वाढविण्यावर भर देईल, राज्याच्या वेगवेगळ्या भागातील गेल्या दोन वर्षांत झालेल्या खरेदी विक्रीची रक्कम विचारात घेत, वेगवेगळ्या भागात वाढीचे वेगवेगळे दर निश्‍चित करण्यात येतील, असे महसूल विभागाच्या सुत्रांनी सांगितले. आठ ते पंधरा टक्केपर्यंत रेडी रेकनर दर वाढ अपेक्षित असून, त्याद्वारे महसुली उत्पन्नात पाच हजार कोटी रुपयांची भर पडण्याची शक्यता आहे.

पुणे, मुंबईपेक्षाही नांदेडमध्ये जमिनीचे भाव गगनाला भिडल्याचे वृत्त आहे. त्यामुळे त्या भागातील अनेक नागरिकांनी गुजरातमधील प्रत्सावित असलेल्या डोलेरा या अद्ययावत शहरात जागा खरेदी करण्याला प्राधान्य दिले आहे. अशा अनेक बातम्यांची शहानिशा करीत नोंदणी आणि मुद्रांक विभाग वेगवेगळ्या भागातील रेडी रेकनर दर निश्‍चित करेल. त्याची अंमलबजावणी दरवर्षी एक एप्रिलपासून केली आहे. मात्र, त्यामुळे दस्त नोंदणी आणि सदनिकांची किमतीत वाढ होईल. त्याचा परिणाम बांधकाम व्यवसायावर होण्याची शक्यता आहे.

……

पुणे २४ तास

महाराष्ट्राच्या मनातील  मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.

बातम्या व जाहिरातीसाठी संपर्क:

संपादक : – मोहिनी मोहिते

Whatsapp:- 7972087808

Youtube, instagram आणि facebook सह