पुणे: (पुणे 24 तास ब्युरो)
महापालिकेच्या कचरा वाहतूक करणाऱ्या डंपरच्या चाकाखाली सापडल्याने पीएमपीबस चालकाला मृत्यू झाला. ही घटना शुक्रवारी (दि. २४) सकाळी वानवडीतील संविधान चौकात घडली. पीएमपी बस आणि कचरा वाहतूक करणाऱ्या डंपरचा किरकोळ अपघात झाला. त्यानंतर पीएमपी चालक बसमधून उतरुन त्याने डंपरचे छायाचित्र काढले. छायाचित्र काढून पाठीमागे जात असतानाच डंपरचालकाने वाहन सुरू केल्याने अपघात झाला. याप्रकरणी वानवडी पोलीस ठाण्यात डंपरचालकावर गुन्हा दाखल करण्यात आला आहे.
संजय मच्छिंद्र देशमुख असे अपघातात मृत्यू झालेल्या पीएमपी चालकाचे नाव आहे. याप्रकरणी डंपरचालक रजत किशोर बाभुळकर (वय २८) याच्याविरुद्ध गुन्हा दाखल करण्यात आला.
पोलिसांनी सांगितले की, पीएमपी बस कात्रजहून हडपसरकडे निघाली होती. वानवडीतील संविधान चौकातून कचरा वाहतूक करणारा डंपर निघाला होता. डंपर बसला घासून गेल्याने आरसा तुटला. अपघातानंतर डंपरचालक न थांबता पुढे गेला. आरसा तुटल्याने पीएमपी चालक देशमुख यांनी तेथून निघालेल्या दुचाकीस्वारला थांबविले. दुचाकीस्वारासह देशमुख यांनी डंपरचालकाचा पाठलाग सुरू केला. काही अंतरावर त्यांनी डंपर थांबविला. त्यानंतर देशमुख यांनी त्यांच्या मोबाइलमधील कॅमेऱ्यांतून डंपरचे छायाचित्र काढले. छायाचित्र काढून पाठीमागे जात असतानाच डंपरचालक बाभुळकर याने डंपर सुरू करून पुढे घेण्याचा प्रयत्न केला. देशमुख हे डंंपरच्या मागच्या चाकाखाली सापडले. गंभीर जखमी झालेल्या देशमुख यांचा जागीच मृत्यू झाला. या घटनेची माहिती मिळताच वानवडी पोलिसांनी घटनास्थळी धाव घेतली. पोलिसांनी डंपरचालक याला ताब्यात घेऊन अटक केली. पुढील तपास पोलीस करीत आहेत.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
