पुणे २४ तास ः- पुणेकरांच्या राजकारणात नेहमीच गणितापेक्षा डावपेच वरचढ ठरतात. पुणे महापालिकेच्या महापौरपदासाठी खुल्या प्रवर्गातील महिला आरक्षण जाहीर होताच भाजपकडून पुन्हा एकदा ‘धक्का’ देण्याची तयारी सुरू असल्याची चर्चा रंगू लागली आहे. पक्षातील निष्ठावंत, अनुभवी नगरसेविकांना डावलून थेट ‘सूनबाई’ंच्या नावाची चर्चा सुरू झाल्याने राजकीय वर्तुळात कुजबुज वाढली आहे.
राज्यातील २९ महापालिकांच्या महापौरपदांच्या आरक्षण सोडतीत पुण्यासाठी खुल्या प्रवर्गातील महिला आरक्षण निश्चित झाले. त्यानंतर भाजपमधील मंजुषा नागपुरे, निवेदिता एकबोटे, मंजुश्री खर्डेकर यांसारख्या अनुभवी नगरसेविकांची नावे स्वाभाविकपणे पुढे आली. मात्र, राजकारणाने नेहमीप्रमाणे अनपेक्षित वळण घेतले.
वडगाव शेरी मतदारसंघात प्रभाव असलेल्या पठारे कुटुंबातील ऐश्वर्या पठारे यांचे नाव अचानक महापौरपदासाठी आघाडीवर येऊ लागले आहे. विमाननगर–लोहगाव प्रभागातून निवडून आलेल्या ऐश्वर्या पठारे या उच्चशिक्षित असून, त्यांचे पती सुरेंद्र पठारे हेही नगरसेवक आहेत. त्यांचे सासरे बापूसाहेब पठारे हे राष्ट्रवादी काँग्रेस (शरद पवार गट)चे आमदार असल्याने ही निवड केवळ महापालिकेपुरती न राहता, व्यापक राजकीय संकेत देणारी ठरेल, असे मानले जात आहे.
महापालिका निवडणुकीच्या तोंडावर ऐश्वर्या व सुरेंद्र पठारे यांनी भाजपमध्ये प्रवेश केला होता. प्रवेशानंतर लगेच उमेदवारी देण्यात आल्याने पक्षातील निष्ठावंतांमध्ये नाराजी व्यक्त झाली होती. मात्र, मोठ्या मताधिक्याने विजय मिळवत पठारे दाम्पत्याने आपली राजकीय पकड दाखवून दिली.
महापौरपद महिला आरक्षणासाठी निश्चित झाल्याने भाजपच्या पहिल्या फळीतील अनेक नेत्यांच्या अपेक्षांवर पाणी फेरले गेले आहे. ‘आपलीच वेळ’ मानून बसलेल्या दिग्गजांचा हिरमोड झाला असून, संघटनात्मक निष्ठा की राजकीय गणित, हा प्रश्न पुन्हा ऐरणीवर आला आहे.
पुण्यात भाजप आपली ‘धक्कातंत्राची’ परंपरा कायम ठेवून महापौरपदावर नवा प्रयोग करणार, की पक्षातील अनुभवी महिला नगरसेविकांनाच संधी देणार, याचा फैसला लवकरच होणार आहे. तोपर्यंत पुण्याच्या राजकीय वर्तुळात ‘महापौर कोण?’ हा प्रश्न चर्चेचा केंद्रबिंदू ठरला आहे.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
