घरमालकाविरुद्ध बेकायदेशीर प्रवेश, मालमत्तेची तोडफोड व जीवे मारण्याच्या धमकीचा आरोप
पुणे, प्रतिनिधी : विश्रांतवाडी परिसरातील मेंटल कॉर्नर येथील कानाडे बिल्डिंगमध्ये ४० वर्षांपासून वास्तव्यास असलेल्या भाडेकरूच्या घराची भिंत घरमालकाने बेकायदेशीररित्या पाडल्याचा गंभीर आरोप करण्यात आला आहे. या प्रकरणी ॲड. किरण गुळवे यांच्या मार्फत विश्रांतवाडी पोलीस ठाण्यात तक्रार अर्ज दाखल करून संबंधितांवर गुन्हा नोंदविण्याची मागणी करण्यात आली आहे.
तक्रारीनुसार, श्री. नेमिचंद शंभुनाथ राठोड हे गेली चार दशके संबंधित ठिकाणी कायदेशीर भाडेकरू म्हणून राहत आहेत. राठोड कुटुंब घराबाहेर असताना घरमालक सुनील वसंत कानाडे व त्यांच्या कुटुंबीयांनी ४ ते ५ अज्ञात मजुरांच्या मदतीने घराच्या पाठीमागील भिंत पाडून घरात प्रवेश केल्याचा आरोप करण्यात आला आहे.
या घटनेत घरातील साहित्याचे मोठ्या प्रमाणात नुकसान झाले असून काही मौल्यवान वस्तूही चोरीला गेल्याचा दावा तक्रारीत करण्यात आला आहे. तसेच या प्रकाराबाबत जाब विचारल्यानंतर राठोड कुटुंबीयांना अश्लील शिवीगाळ करत जीवे मारण्याची धमकी देण्यात आल्याचाही आरोप करण्यात आला आहे.
या संदर्भात ॲड. किरण गुळवे यांनी सांगितले की, न्यायालयाच्या आदेशाशिवाय कोणत्याही भाडेकरूला जबरदस्तीने घराबाहेर काढता येत नाही. त्यामुळे संबंधितांनी कायदा हातात घेतल्याचा हा गंभीर प्रकार असून भारतीय न्याय संहिता (BNS) अंतर्गत लागू असलेल्या गंभीर कलमांनुसार तातडीने प्रथम माहिती अहवाल (FIR) नोंदवून आरोपींवर कायदेशीर कारवाई करण्याची मागणी करण्यात आली आहे.
दरम्यान, या प्रकरणात पोलिसांकडून अद्याप अधिकृत गुन्हा दाखल झाल्याची माहिती मिळालेली नसून, तक्रारीची चौकशी सुरू असल्याचे समजते. पुढील तपास विश्रांतवाडी पोलीस करत आहेत.
महाराष्ट्राच्या मनातील मराठी न्यूज चॅनेल. खऱ्या बातम्या, निष्पक्ष विश्लेषण आणि जनसामान्यांचे प्रश्न मांडणारे विश्वसनीय व्यासपीठ.
बातम्या व जाहिरातीसाठी संपर्क:
संपादक : – मोहिनी मोहिते
Whatsapp:- 7972087808
Youtube, instagram आणि facebook सह
